Nanutok ng boga sa bagets, arestado

@Balitang Probinsiya | July 16, 2020

ISABELA—Isang helper ang inaresto ng pulisya dahil sa panunutok nito ng baril sa isang binatilyo kamakalawa sa Bgy. Alao East, Santiago City.

Kinilala ang suspek na si Pablo Sagabaen, residente sa nasabing barangay.

Ayon sa ulat, habang naglalakad umano ang binatilyong itinago sa pangalang “Melvin”, 16-anyos ay nakasalubong nito si Sagabaen at sa hindi malamang dahilan ay tinutukan ng baril ng suspek ang biktima.

Dahil sa takot ay tumakbo ang biktima at isinumbong sa kanyang mga magulang ang pangyayari at pagkaraan ay humingi sila ng tulong sa pulisya kaya inaresto ang suspek na nakumpiskahan ng .45 pistola.

Nakapiit na ang suspek na nahaharap sa mga kasong grave threat at illegal possession of firearms and ammunitions.