Naaagnas na bangkay, natagpuan sa sapa

@Balitang Probinsiya | Enero 6, 2023

CAMARINES SUR—Isang naaagnas na bangkay ng lalaki ang natagpuan kamakalawa sa sapa na sakop ng Bgy. San Rafael, Lagonoy.

Ang biktima ay kinilala ng pulisya na si Jerry Claronino, 22-anyos, residente ng Bgy. Camagong, San Jose sa nasabing lalawigan.

Nabatid na ilang residente ang nakatagpo sa naagnas na bangkay ng biktima sa Malabog Creek sa nasabing barangay.

Huli umanong nakitang buhay si Claronino habang namimingwit ng isda noong bisperas ng Bagong Taon.

Patuloy pa ang isinagawang imbestigasyon ng mga awtoridad para mabatid ang sanhi ng ikinamatay ni Claronino at kung may naganap na foul play sa kamatayan nito o kung aksidenteng nalunod sa sapa ang biktima.