Mag-asawa tiklo sa 6 na boga at mga bala

@Balitang Probinsiya | May 6, 2022

QUEZON – Inaresto ng mga tauhan ng pulisya ang mag-asawang nag-iingat ng anim na baril at mga bala kamakalawa sa Bgy. Madulao, Catanauan sa lalawigang ito.

Ang mag-asawang suspek ay kinilala ng pulisya na sina Miel at Jacqueline Tan, kapwa nasa hustong gulang at mga residente sa nabanggit na barangay.

Nabatid na sinalakay ng pulisya ang bahay ng mga suspek sa bisa ng search warrant na inisyu ng korte at dito nakumpiska ang anim na iba't ibang uri ng baril at mga bala.

Kusang sumama naman sa pulisya at hindi na nanlaban ang mga suspek nang dakpin sila ng mga awtoridad.

Nahaharap ngayon ang mga suspek sa kasong 6-counts ng illegal possession of firearms and ammunitions.