Lasing na rider sugatan sa aksidente

@Balitang Probinsiya | October 12, 2022

AKLAN—Isang lasing na rider ang sugatan nang aksidenteng bumangga ang minamaneho nitong motorsiklo sa likurang bahagi ng SUV (sports utility vehicle) kamakalawa sa Bgy. Poblacion, Kalibo.

Ang biktima ay kinilala ng pulisya na si Benedict Imason, 44-anyos at residente ng nabanggit na barangay.

Ayon sa ulat, dahil sa kalasingan ay nawalan umano ng kontrol si Imason sa pagmamaneho ng motorsiklo, kaya bumangga ito sa likurang bahagi ng SUV na minamaneho ng hindi pinangalang driver.

Nabatid na nagtamo ng sugat sa ulo at katawan ang biktima at sa kasalukuyan ay ginagamot pa siya sa ospital.

Nangako naman ang driver ng SUV na sasagutin niya ang gastos ni Imason sa pagpapagamot sa ospital.