Laborer patay, kaibigan sugatan sa pananaksak

@Balitang Probinsiya | December 27, 2022

PALAWAN—Isang 54-anyos na laborer ang namatay at sugatan naman ang kaibigan nito nang saksakin sila ng kanilang mga kaalitan kamakalawa sa Bgy. Matahimik, Puerto Princesa City.

Ang nasawi ay nakilalang si Bonifacio Dadivas, samantalang ang sugatan ay si Wilmar Lucay-Lucay, nasa hustong gulang, kapwa residente sa naturang lungsod.

Ayon sa ulat, habang nasa loob ng kanyang bahay si Dadivas at kakuwentuhan ang kaibigan niyang si Lucay-Lucay ay biglang pumasok ang tatlong suspek na nakilala lang sa mga alyas na Evan, Wen at Mark, pawang nasa hustong gulang at agad pinagsasaksak sa katawan ang dalawang biktima.

Matapos ang pananaksak ay mabilis na tumakas ang mga suspek, samantalang dinala ng mga residente ang dalawang biktima sa ospital, pero idineklarang dead-on-arrival si Dadivas.

Nagpalabas na ng manhunt operations ang pulisya para madakip ang mga suspek.