Kelot tinodas sa bahay

@Balitang Probinsiya | May 12, 2022

QUEZON – Isang lalaki ang namatay nang barilin ng kanyang kaalitan kamakalawa sa loob ng kanyang bahay sa Bgy. Camflora Sinturisan, San Antonio sa lalawigang ito.

Kinilala ng pulisya ang biktimang nagtamo ng mga tama ng bala sa katawan na si Ryan Mendoza, samantalang ang suspek ay si Edwin Masilungan, kapwa nasa hustong gulang at parehong residente sa nasabing bayan.

Ayon sa ulat, habang nasa loob ng kanyang bahay si Mendoza ay biglang pumasok ang suspek at pinagbabaril ang biktima.

Matapos tiyaking patay na ang biktima ay saka mabilis na tumakas ang suspek.

Nagpalabas na ngayon ng manhunt operation ang pulisya para madakip si Masilungan.