Kawatan ng internet cable, nasakote

@Balitang Probinsiya | May 23, 2023

NEGROS OCCIDENTAL—Isang magnanakaw ng kable ng internet ang dinakip ng mga tauhan ng pulisya kamakalawa sa Bgy. Singcang-Airport, Bacolod City sa lalawigang ito.

Itinago muna ng pulisya ang suspek sa alyas na "Mario" nasa hustong gulang habang iniimbestigahan ito ng mga awtoridad.

Ayon sa ulat, may nag-report sa pulisya na ninanakaw ni "Mario" ang mga kawad ng internet sa nasabing barangay kaya agad rumesponde ang mga operatiba at dinakip ang suspek.

Hindi na nanlaban ang suspek nang dakpin siya ng mga awtoridad sa nasabing lugar.

Nakapiit na ngayon ang suspek sa detention cell ng himpilan ng pulisya at sinampahan na ng kasong qualified theft.