Habal-habal driver, kinatay ng kaalitan

@Balitang Probinsiya | November 2, 2023

NEGROS OCCIDENTAL -- Isang 53-anyos na habal-habal driver ang namatay nang pagsasaksakin ng kanyang nakaalitan kamakalawa sa Brgy. 5, San Carlos City sa lalawigang ito.

Kinilala ng pulisya ang biktimang nagtamo ng mga tama ng saksak sa katawan na si Danilo Ambayan, samantalang hindi muna pinangalanan ang suspek hangga’t hindi pa ito nadadakip ng mga awtoridad.

Ayon sa ulat, habang nag-uusap ay nagkaroon ng pagtatalo ang dalawa na humantong para maglabas ng patalim at pagsasaksakin ng suspek ang biktima.

Agad dinala ng mga saksi ang biktima sa ospital, pero idineklara itong dead-on-arrival.

Nagpalabas na ngayon ng manhunt operation ang pulisya para madakip ang suspek.