Babae, huli sa akto sa P1M shabu

ni Gina Plenago @News | October 22, 2026

Photo: PNP-SPD

Nasamsam ng awtoridad sa 26-anyos na bebot at kasamang lalaki ang nasa mahigit P1 milyong halaga ng hinihinalang shabu sa buy-bust operation sa lungsod ng Taguig Martes ng gabi.

Isinagawa ng mga tauhan ni Southern Police District Director P/BGen. Rodel Pastor ang operasyon laban sa mga suspek nang makipagtransaksiyon ang dalawa, alas-7:25 ng gabi sa isang operatiba ng District Drug Enforcement Unit sa Brgy. Hagonoy, Taguig.

Tinanggap ng suspek na babae na si alyas Patty ang markadong salapi, kapalit ng ibinentang isang sachet na naglalaman ng umano'y shabu at dito na hinuli ng mga pulis na nakamasid sa paligid, pati na ang 24-anyos na kanyang kasamang si “Weng.”

Nakuha sa dalawa ang kabuuang 150-gramo ng umano'y shabu na nagkakahalaga ng P1,020,000 pati na ang markadong salapi na ginamit sa operasyon.