Armadong kelot nakapuga sa raid

@Balitang Probinsiya | September 23, 2022

AKLAN—Isang armadong lalaki ang nakatakas sa isinagawang raid ng pulisya kamakalawa sa bahay nito sa Bgy. Balabag, Malay.

Kinilala ang suspek na si Marvin Sibulan, nasa hustong gulang at nakatira sa nabanggit na barangay.

Ayon sa ulat, may tinanggap na impormasyon ang pulisya na may mga armas sa bahay ni Sibulan kaya sa pamamagitan ng search warrant ay sinalakay ito, pero nakatakas ang suspek.

Gayunman, nakakumpiska ang mga awtoridad ng baril, mga bala at granada sa bahay ni Sibulan.

Nagpalabas na ngayon ng manhunt operations ang pulisya para madakip ang suspek upang sampahan ng kasong illegal possession of firearms, ammunitions and explosives.