Ama na umawat sa away, patay sa saksak

@Balitang Probinsiya | February 10, 2022

ILOCOS SUR–Isang ama na umawat sa away na kinasasangkutan ng kanyang anak ang napatay sa saksak kamakalawa sa bayan ng Burgos.

Nakilala ang biktima na nagtamo ng mga tama ng saksak sa katawan na si Alfredo Decano, Sr., samantalang ang suspek ay si Danilo Foronda, kapwa nasa hustong gulang at mga residente sa nabanggit na bayan.

Ayon sa ulat, nakaaway ni Foronda ang anak ni Alfredo na si Alberto at nang pumagitna ang biktima para umawat ay ito ang napagbalingang pagsasaksakin ng suspek.

Dinala pa ng mga saksi si Alfredo sa ospital, pero idineklara itong dead-on-arrival.

Kaagad namang nadakip ng mga nagrespondeng pulisya ang suspek.