9 katao, sugatan sa bumaliktad na e-trike

@Balitang Probinsiya | October 14, 2022

AKLAN—Siyam katao ang sugatan nang aksidenteng bumaligtad ang kinalululanan nilang e-trike (electric tricycle) kamakalawa sa Bgy. Manoc-Manoc, Boracay Island.

Sa siyam na biktima, tanging ang driver pa lang ng e-trike ang kinilala ng mga awtoridad sa pangalang Ariel Tablate, nasa hustong gulang at nakatira sa nasabing barangay.

Ayon sa ulat, nawalan umano ng kontrol sa pagmamaneho ng e-trike si Tablate habang nakalulan dito ang walo niyang pasahero hanggang sa bumaligtad ang naturang sasakyan.

Kaagad dinala ng mga saksi ang mga biktima sa pagamutan at kasalukuyan na silang ginagamot sa ospital.

Patuloy pa ang imbestigasyon ng pulisya sa naganap na aksidente.