3 Sugarol, huli sa tong-its

@Balitang Probinsiya | July 17, 2022

AKLAN—Tatlong sugarol ang inaresto ng pulisya nang mahuli sa aktong nagsusugal ng tong-its kamakalawa sa Bgy. Manoc-Manoc, Boracay Island, Malay.

Ang mga suspek ay nakilalang sina Alvin Gelito, Darlie Fabunan at Nida Garcia, pawang nasa hustong gulang at mga residente sa nabanggit na lalawigan.

Ayon sa ulat, may nagbigay-impormasyon sa himpilan ng pulisya na may mga nagsusugal sa nasabing lugar kaya agad sinalakay ng mga operatiba ang gambling den at dito nadakip ang tatlong sugarol, samantalang nakatakas naman ang iba pang suspek.

Nakakumpiska ang mga awtoridad ng mga baraha at cash sa pag-iingat ng mga suspek.

Inihahanda na ng pulisya ang kasong paglabag sa RA 1602 o illegal gambling laban sa tatlong sugarol.