Paghatol ng guilty sa kasong cyber libel kay Maria Ressa, normal lang!

Hinatulan ng guilty sa kasong cyber libel ang journalist na si Maria Ressa.

Normal lang ‘yan!

◘◘◘

BAHAGI ng trabaho ng isang journalist na makasuhan ng libelo.

Ang masama, kapag ang vendor na si “Juan” ay makasuhan ng cyber libel — ‘yan ang nakababahala!

◘◘◘

NAAAWA tayo sa mga journalist na nagagalit kapag nakakasuhan ng libelo.

‘Yan ang mas nakakahiya.

Hindi nila alam ang pinasok nilang propesyon!

◘◘◘

HALIMBAWA, normal sa isang sundalo ang mamatay sa engkuwentro.

Ang masama ay mamatay ang sundalo habang nag-aatip ng bubong!

◘◘◘

NANGHIHINAYANG tayo sa isang insidente kung saan nahulog habang nag-aatip ng bubong ang popular na lider ng mga militante.

Hindi siya napatay sa gitna ng protesta, bagkus ay nang bumagyo, umakyat sa bubong—inayos ang yero at nahulog, dedo!

◘◘◘

NORMAL din sa mga medical staff kasama ang doktor na mahawa sa mga may sakit na pasyente—may COVID-19 man o wala, bahagi ‘yan ng kanilang propesyon.

Ang bawat propesyon ay may kani-kanyang panganib!

◘◘◘

MINSAN nakikita sa media na nanggagalaiti an journalist matapos maaresto dahil sa kasong libelo.

Hindi ‘yan nakakahiya, bahagi ‘yan ng trabaho!

◘◘◘

MARAMI ang nakasuhan ng libelo pero naabsuwelto at marami rin ang idineklarang guilty.

Bibihira ang journalist na hinatulan ng guilty pagdating sa Korte Suprema!

◘◘◘

MAY mga nahapan ang Korte Suprema na guilty sa libelo—pero hindi mga journalist.

Hinahanap ng korte ang motibo sa paglalathala.

Kapag pinersonal o nakinabang nang personal ang reporter o editor sa kanyang ulat—nagkakaroon ng malisya ang proseso.

Ang malisya o motibo—kung gaano man kabigat, ‘yan ang susuriin ng hukuman!

◘◘◘

IGALANG natin ang hukuman.

Simple lang ang isyu libelo—hindi ito maselang isyu ng “malayang pamamahayag”.

Bagkus ito ay normal na praktis sa isang propesyon!

◘◘◘

MARAMING mamamahayag ang “hao shiao”, kunwa-kunwari lang at talagang pera-pera lang.

Sila ang mga takot sa libelo!

◘◘◘

KAPAG masama ang loob ng journalist na makasuhan ng libelo—wala siyang karapatang maging journalist.

Mas malaman ay isa siyang “hao shiao” at talagang guilty ang pobre!

. .