Mga jeepney drivers, nangangalakal na kesa walang makain

Marami pa rin ang hindi nakakabalik sa kani-kanilang trabaho bagama’t, may iba na balik-operasyon na ang negosyo.

Sa isang ulat, sa kahabaan ng Avenida Avenue sa Lungsod ng Maynila ay mamamataan umano ang grupo ng mga jeepney drivers na namamalimos na matapos matigil ang pasada mula nang ipatupad ang community quarantine.

Bukod sa pamamalimos, pinasok na rin nila ang pangangalakal para may pangkain sa araw-araw.

Nauunawaan umano nila kung hindi pa puwedeng bumiyahe, subalit ang pakiusap nila ay maalalayan din ng gobyerno.

Kaya patuloy ang panawagan hindi lang ng mga tsuper kundi ng iba pang manggagawa na natambay na bigyan sila ng alternatibong mapagkakakitaan.

Hindi lang para sa kasalukuyang sitwasyon kundi maging sa hinaharap.

Kung ngayon pa lang ay marami nang negosyo ang nagsasara, ano pang babalikan ng mga manggagawa?

Sana, sa lalong madaling panahon ay makapaglatag na ng mga istratihiya at mekanismo ang gobyerno laban sa posibleng paglala ng lagay ng ekonomiya ng bansa.