Morado at Mejia, inangkin ang PSC chess crown

Inangkin nina National Master Jeth Romy Morado at Woman FIDE Master Cherry Ann Mejia ang korona sa kani-kanyang grupo nang magsara ang 2020 Philippine Sports Commission (PSC) - National Chess Federation of the Philippines (NCFP) Selection Chess Championships 2nd Quarter sa PACE, Project 6, Quezon City.

Pitong puntos mula sa limang panalo, apat na tabla at isang talo na kartada ang ginawang armas ni Morado pagkatapos ng 11 rounds ng tagisan ng husay sa boards upang daigin sina International Masters Ricardo De Guzman (2nd) at Jan Emmanuel Garcia (3rd) at untitled Israelito Rilloraza (4th) para sa unang puwesto. Pare-parehong nagsuko sina De Guzman, Garcia at Rilloraza ng tig-6.5 puntos at sa tiebreak output na lang nagkatalo para sa puwestuhan sa torneong nilapatan ng 90 minuto-30 segundong panuntunan. Kasama sa mga nakatikim ng pangangaldag ni Morado ay sina IM John Marvin Miciano (rating: 2346) at FM Alekhine Nouri (rating: 2216).

Kamakailan lang ay namayagpag din si Morado, may ELO rating na 2260, sa 75th Philippine National Chess Championships National Capital Region Elimination leg sa Pasay City. Sa kababaihan, nangolekta si Mejia (rating: 1972) ng 7.5 puntos para makaungos laban kina Woman International Master Bernadette Galas (rating: 2081) at WIM Marie Antoinette San Diego (rating: 2117) na kapwa nakaipon lang ng tig-pipitong puntos sa maigting na kumpetisyon. Si Galas ang naging segunda habang tumersera si San Diego.