Sinuntok daw ng mister ng Pop Princess… Ibinulgar ng bodyguard ni Sarah: Si Mommy Divine ang nag-uto

Ronalyn Seminiano / Showbiz Trend

Dumami lalo ang galit sa ina ni Sarah Geronimo na si Mommy Divine matapos sumulpot sa Tulfo in Action na radio program ni Raffy Tulfo ang bodyguard ng singer-actress na si Jerry Tamara.

Reklamo ni Jerry, sinuntok siya diumano ni Matteo Guidicelli matapos sumugod at magwala sa kasal ng aktor at ng Pop Princess ang madir ni Sarah. Bagay na itinanggi ni Matteo sa interview ni MJ Felipe at maging sa IG post niya.

Ikinuwento ni Jerry kay Tulfo ang diumano’y katotohanan sa mga pangyayari sa kasalang Sarah at Matteo kung saan ayon sa Pep.ph, inamin niyang si Mommy Divine ang nag-utos sa kanyang ipa-blotter ang aktor sa Taguig Police.

Ayon din sa Pep, “Si Mommy Divine rin ang pinaniniwalaang may idea na ‘ipa-Tulfo’ si Matteo ni Tamara” since nabanggit ng nasabing bodyguard na ang madir ni Sarah ang nagpapasuweldo sa kanya.

Nakakaloka dahil hanggang hindi lumalabas sa publiko ang ina ni Sarah, tiyak na lalong lalala ang inis at galit sa kanya ng madlang pipol dahil sa mga kumakalat na balita.

Mas pabor naman kaming manahimik na lang din si Sarah dahil sabi nga, less talk, less mistake. Anuman kasi ang sabihin niya, tiyak na lalo lang makakasira sa relasyon nilang mag-ina lalo na kapag nakisawsaw na ang maraming pakialamera.