Casimero, hindi pasisindak kay Inoue sa unification bout

Kumpiyansa si MP Promotions president at international matchmaker Sean Gibbons na kayang tapatan ni World Boxing Organization (WBO) bantamweight champion Johnriel Casimero si two-tile holder Naoya “The Monster” Inoue sa kanilang unification bout sa Abril 25 sa Mandalay Bay Events sa Las Vegas, Nevada. Hindi umano nasisindak ang 29-anyos na tubong Ormoc City sa hawak na 19-0 at 16KOs kartada ng kampeon ng International Boxing Federation at World Boxing Association (WBA) dahil kaya nitong maging mas agresibo at mas palaban sa kanilang unification bout.

Ang Japanese slugger na si Inoue ay lalaban sa unang pagkakataon sa ilalim ng Top Rank Promotions Inc. ni Bob Arum matapos itong pumirma ng multi-fight agreement, kasunod ng matagumpay na panalo nito laban kay “Filipino Flash” Nonito Donaire noong Nob. 7 para sa World Boxing Series bantamweight tournament sa isang 12-round unanimous decision. “This guy (Casimero) is a very dangerous person inside the ring and I think he can mix and match with the Monster coming their fight,” wika ni Gibbons sa ginanap na press conference ng PSA sa Maynila.

Malaki umano ang paniniwala ni Gibbons na maitatala ni Casimero ang pangalan sa mundo ng pandaigdigang boxing sakaling mapagtagumpayang talunin ang 26-anyos na three-division world champion. “The Filipino people will definitely know who’s Johnriel Casimero after the fight on April 25, he will be pretty known by everyone,” wika ni Gibbons. Tingin ni Casimero, kaya niyang talunin at pabagsakin si Inoue dahil nakikita niya ang mga kahinaan nito at kaya niyang pasukan at tamaan. Sa kabilang banda, sa sariling press conference ni Inoue sa Tokyo, Japan, sinabi nitong maigi niyang pag-aaralan ang mga istratehiya at galaw ni Casimero dahil aminado ito na delikado at malakas na kalaban ang Filipino fighter.

“He is an aggressive and hard-punching boxer, who is dangerous and wild enough. I wish to carefully watch his strategy and strength as well,” pahayag ni Inoue sa fightnews.com, kasama ang manager/promoter nitong si Hideyuki Ohashi at trainer/ama na si Shingo Inoue. “I’m happy to be able to engage in a unification bout with Casimero with our three world belts on the line. This will be the first for a Japanese boxer to win three world belts if victorious. I plan to enter the US three weeks before to be in tip-top shape on the fight day,” esplika nito sa isang interpreter.

Tungkol naman sa nalasap na optical injury na nakuha laban kay Donaire sa Saitama, Japan noong Nobyembre ay sinabi nitong nakarecover na umano siya. “I have already started sparring, and I’ve no problem in my right eye. I’ve completely recovered from the unexpected injury,” sambit nito.

Magiging ika-5 Pinoy si Casimero sa mga nakalaban ni Inoue na kinabibilangan nina Crison Omayao, Jerson Mancio, at Warlito Parrenas na nauwi lahat sa knockout, habang unanimous decision ang panalo laban kay Donaire.