Baby Falcons, winalis ang 1st round ng UAAP HS basketball

Pormal na winalis ng Adamson University ang unang round ng UAAP Season 82 High School Girls’ Basketball Tournament matapos talunin ang De La Salle-Zobel, 56-36, kahapon sa Paco Arena.

Mayroon lamang limang puntos na bentahe, 35-30 sa bungad ng third canto, umarangkada ang Lady Baby Falcons at nagtala ng 14-2 run upang palobohin ang lamang, 47-32, may natitira na lamang 9:42 oras sa laban. “Sabi ko sa kanila, “Face each opponent as if they are they are the strongest in the league para hindi nagkukumpiyansa,” Praise God kasi nu’ng medyo pahuli na, mas naging okay laro namin,” wika ni Adamson coach Ewon Arayi.

Namuno si Joan Camagong sa nasabing pagkumpleto ng first round sweep ng Adamson sa 4-team tournament sa itinala nitong 13 puntos, 12 rebounds at 3 steals.

Nasayang ang itinala ni Achrissa Maw na 10 puntos at 23 rebounds at ang double double na tig-13 puntos at rebounds ni Jeehan Ahmed dahil hindi nila nagawang ipanalo ang Junior Lady Archers na sumadsad sa markang 1-3.

Sa isa pang laban, bumalikwas ang University of Santo Tomas sa nakaraang 70-81 kabiguan sa Adamson matapos durugin ang Ateneo High School, 112-27.

Nanguna si Bridgette Santos sa panalo ng Junior Tigresses sa itinala nitong 17 puntos, 14 rebounds, 7 assists at 6 steals.

Dahil dito, nagtapos na segunda sa first round ang UST taglay ang 2-1 na baraha habang nanatili namang winless ang Junior Lady Eagles.