Medalists Cebuano athletes ng SEAG, may pamasko pa!

May naghihintay pang dagdag na Pamasko mula sa Cebu City Government ang mga Cebuano athletes na namayagpag sa naganap na 30th South East Asian (SEA) Games.

Nang ipatawag ng alkalde rito ang mga atleta, mas malaki ang igagawad nilang cash prize para sa mga nagka-medalya dahil sa kanilang pagsisikap.

Pagkakalooban ang gold medalist ng P300,000 na cash; P200,000 ang silver medalists at P100,000 sa mga naka-bronze medal.

Para kay alkalde Edgardo Labella na lumabas sa Bombo Radyo, nararapat na ipagmalaki at bigyang karangalan ang mga atleta ng Cebu na nagtagumpay sa biennial meet dahil sa kakaiba nilang talento at galing na ipinakita para sa bayan.

Kaya naman agad niyang iniutos sa City Council na ipasa ang resolusyon para sa pagbibigay ng cash incentives sa mga atleta.

Ipinatawag sa courtesy call ang ilang Cebuano athletes tulad Wilbert Aunzo at Pearl Marie Cañeda na pawang gold medalists sa dancesport, double gold medalist na si Margielyn Didal, marathoner at silver medalist na si Mary Joy Tabal at iba pa.

Naroon din sa courtesy call si Philippine Sports Commission Commissioner Ramon Fernandez at Cebu City Sports Commission Chairman Eduward Hayco.