Dalawang kampeonato sa Blue Blade gamefarm

Walang dudang pinakamatagumpay na gamefowl breeder sa Pilipinas, si Sonny Lagon ay patuloy na pinagharian ang labanan matapos ang dalawang malalaking panalo sa ginaganap na 2019 Stag season.

Si Lagon na naging pangunahing bayani ng Thunderbird Power Feeds sa mahigit na labinlimang taon ay unang nakopo ang 2019 World Pitmasters Cup 6-Stag Big Event noong nakaraang buwan.

Noon naman nakaraang araw ng Linggo, unang araw ng Disyembre, ang may-ari ng Blue Blade Gamefarm ay muling nagdagdag ng isa pang guhit sa mahabang listahan ng kanyang mga kampeonato matapos na masolo ang prestihiyosong Battle of the Idols 6-Stag Big Event.

Sa dalawang pagwawagi, muling ibinandera ni Lagon ang kanyang maalamat na Machine Kelso linyada ng mga tinale na sa ngayon ay siya nang pinakasikat na lahi ng mga manok-panabong sa bansa.