Naka-2 ginto na ang ‘Pinas sa modern pentathlon

Photo: Abs-cbn News

Dalawa na ang ginto ng Pilipinas sa Modern Pentathlon ng 30th Southeast Asian Games matapos magwagi si Michael Ver Anton Comaling sa Men’s Individual Beach Triathle sa Subic Bay Boardwalk kahapon ng umaga.

Naghari si Comaling sa pinagsamang karera ng langoy at takbo at barilan sa oras na 17:08.87.

Ang pilak ay napunta kay Phurit Yohuang ng Thailand (17:19.83) at tanso kay Muhammad Taufik ng Indonesia (17:37.76).

Ang isa pang Pinoy, si Dexter Ardemer, ay nagtapos sa ika-pitong puwesto sa oras na 22:05.51.

Ang ginto ni Comaling ay magandang kasunod sa ginto ng tambalan nina Samuel German at Princess Honey Arbilon sa Beach Laser Mixed Relay noong Huwebes.

Subalit, nabigo si Arbilon na makuha ang kanyang pangalawang ginto matapos siyang magtapos sa ika-apat na puwesto lamang sa Women’s Individual Beach Triathle sa oras na 21:29.36 sa likod ng dalawang Indonesian na sina Dea Salsabila Putri ng Indonesia (19:52.73) at Cintya Nariska (20:02.02) at Sanruthai Aransiri ng Thailand (20:50.97).