May bago nang BF, kinukulit pa rin ng dating ka-fling kaya problemado

Dear Roma, Ako si Nicky, 27 at may boyfriend. Gusto kong humingi ng payo sa inyo dahil kamakailan ay nanggugulo ang dati kong ka-fling noong college pa ako. Nu’ng una, akala ko, simpleng nangungumusta lang siya kaya pinansin ko, pero habang tumatagal ang pag-uusap namin ay naiinis na ako dahil nagpupumilit siyang makipagkita sa akin kahit ayaw ko. Okay naman kami ng BF ko at ayaw kong maging problema ito, pero ayaw niya akong tigilan kaya naiinis talaga ako. Ano ang dapat kong gawin? — Nicky

Nicky, Naku, sis, nakakainis talaga ang mga ganyang tao dahil kung kailan masaya at kuntento ka na sa buhay mo, saka siya susulpot at manggugulo. Kung ayaw ka niyang tigilan kahit paulit-ulit kang tumatanggi, huwag mo na siyang pansinin dahil sa huli, siguradong mapapagod din siya at siya ang kusang titigil sa pangungulit sa iyo. Gayundin, huwag mong hayaan na makaapekto ito sa relasyon ninyo ng BF mo. Okay?