Bangkay ng negosyante natagpuan sa balon

CAMARINES NORTE — Isang negosyante ang natagpuang patay kamakalawa na nakalutang sa balon sa Bgy. Banocboc, Vinzons.

Kinilala ng pulisya ang biktima na si Jonathan Umerez, nakatira sa nabanggit na barangay.

Ayon sa ulat, ilang kamag-anak ni Umerez ang nakatagpo sa bangkay ng biktima na nakalutang sa nasabing balon.

Batay sa imbestigasyon ng pulisya, posible umanong walang nakakita nang aksidenteng mahulog sa balon ang biktima kaya ito nalunod.

Samantala, patuloy pa rin ang imbestigasyon ng mga awtoridad upang malaman kung may naganap na “foul play” sa pagkamatay ng biktima.