Mag-utol binoga, 1 patay

QUEZON — Isang tricycle driver ang namatay habang sugatan naman ang nakatatandang kapatid nito nang pagbabarilin sila ng hindi kilalang armadong salarin kamakalawa sa Bgy. Malabanban Sur, Candelaria.

Kinilala ang nasawi na si Victor Landicho, 28-anyos, samantalang, ang sugatan ay ang kapatid nitong si Menardo, 38-anyos, kapwa nakatira sa nabanggit na bayan.

Batay sa imbestigasyon, habang minamaneho ni Victor ang tricycle at nakasakay ang kapatid nitong si Menardo ay biglang sumulpot ang suspek at agad pinagbabaril ang mga biktima na kapwa tinamaan ng mga bala sa iba’t ibang bahagi ng katawan.

Nang umalis ang suspek ay agad dinala ng mga saksi ang magkapatid sa ospital, pero idineklarang dead-on-arrival si Victor.

Iniimbestigahan na ng pulisya ang motibo ng suspek sa pamamaril sa magkapatid na biktima.