Eala, tututukan ang Pro-Circuit Tournament

Pupuntiryahin ni World junior’s singles no. 13 Alex Eala ang pangarap nitong maging professional tennis player balang araw – at sisimulan niya ito sa susunod na taon.

At simula sa susunod na taon, magsisimula na ang 14-anyos na tennis player na sumabak sa pro-circuit tournaments upang mas mapataas pa ang rankings nito sa International Tennis Federation (ITF).

“Yes, I want to go pro, obviously it’s one of my goals so I think (starting next year) I will definitely be joining more pro tournaments,” wika ni Eala kasama ang kanyang ama na si Mike Eala, Martes, sa lingguhang PSA Forum sa Amelie Hotel sa Manila.

Nakatakdang lumipad patungong Spain ang Grade 9 student mula sa American International School sa Mallorca upang ipagpatuloy ang pag-aaral nito.

Siya rin ay nasa ilalim ng scholarship program ng Rafael Nadal Academy. “The minimum age of playing for professional tennis is 14 years old, and Alex turned 14 last May,” wika ng amang si Mike. “Ang tricky part there is you have to reach a minimum number of points before you can get to the main draw of the (pro) tournaments, so the plan for Alex if she gets to the top 5 of the juniors, you get wildcards to play in the tournaments,” dagdag nito.

Mayroon umanong apat na grand slams ang junior tournaments habang sasabayan niya ang pagsali sa ilang pro tourneys kaya’t magiging mabilis ang takbo ng karera nito sa mga laro sa ibang bansa.

Mabilis na umangat ang ranking ni Eala sa juniors division na nagsimula lamang sa 113 noong Enero matapos niyang makuha ang titulo sa Cape Town sa South Africa at runner-up finish sa ITF Osaka Mayor’s Cup sa Japan.