Coach Cone, natuwa sa ‘kumpletong’ Gilas players

Patuloy ang kagalakan ni Gilas Pilipinas head coach Tim Cone matapos makumpletong muli ang kanyang manlalaro na nasa pool para sa 2019 Southeast Asian Games.

Lahat ng miyembro ng 15-man pool ng Gilas Pilipinas ay nakadalo sa ensayo noong Lunes ng gabi sa Meralco Gym kahit pa abala ang karamihan sa mga manlalaro sa kanilang kampanya sa PBA Governors’ Cup.

Galing lang ang Barangay Ginebra sa kanilang panalo kontra sa Magnolia noong Linggo habang nakalaro rin ang San Miguel kontra sa Columbian noong araw ding iyon. Ang mga nagpunta sa ensayo ay sina LA Tenorio, Scottie Thompson, Japeth Aguilar, Greg Slaughter, Stanley Pringle, June Mar Fajardo, Marcio Lassiter, Chris Ross, Christian Standhardinger, Matthew Wright, Troy Rosario, RR Pogoy, Jayson Castro, Vic Manuel, at Art Dela Cruz. “We have great attendance today. I told the players I came here thinking that two or three guys wouldn’t show up because that’s kind of what the national team goes through. We had all 15 guys and we wanted them to keep coming. We are proud with all these guys who are showing up,” ani Cone.

Ayon kay Cone ay mas pinagtutuunan niya ng pansin ang depensa kontra sa koponan sa Southeast Asia na determinadong makakuha ng upset kontra sa Gilas Pilipinas. Ang torneo ng basketball sa SEA Games ay gaganapin Disyembre 4 hanggang 10 sa Mall of Asia Arena sa Pasay City.