Pacio, mas malakas daw kay Catalan sa One: Fate

Kung pagbabasehan umano ang kakayanang manalo sa loob ng octagon ring, mas malaki ang tsansang maidepensa ni ONE straw weight champion Joshua “The Passion” Pacio ang kanyang titulo laban kay Rene “The Challenger” Catalan sa paghaharap ng dalawa sa ONE: Master of Fate sa Nob. 8 sa MOA Arena sa Pasay City.

Ito ang nakikitang resulta ni dating ONE lightweight world champion Eduard “The Landslide” Folayang sa tapatan ng dalawang Wushu Artists. Kahit pa man mas bata si Pacio kumpara kay Catalan, mahigit naman ang lamang nito pagdating sa eksperyensiya sa Mixed Martial Arts laban kay Catalan. “What Catalan will bring is his experience, but of course this is MMA we’re talking about. When we talk about MMA, Joshua has more fights,” wika ni Folayang sa isang report. “On the amateur level, Catalan is more experienced. He’s a World Champion in wushu – there’s no doubt about that. But for me, I’m with Joshua on this one. Both of them are wushu artists but Pacio grew up in MMA, Catalan merely adapted,” dagdag ni Folayang.

Bitbit ng 40-anyos na si Catalan ang eksperyensyang nakuha mula sa pagwawagi nito bilang World Champion, Asian at Southeast Asian Games gold medalist sa wushu. Si Catalan ay nakatakda ring sumabak sa men’s under 57kgs Combat category sa Sambo event sa biennial meet na magbubukas simula Nob. 30-Dis. 11 sa iba’t ibang parte ng Luzon.

Pero para kay Folayang, naniniwala ito na marami pang kailangang matutunan si Catalan sa mundo ng MMA. Ngunit ayon kay Pilipinas Sambo Federation Inc. (PSFI) secretary-general Paolo Tancontian, matindi umano ang paghahandang ginagawa ni Catalan para sa kanyang pag-asang makuha ang kauna-unahang World title sa MMA at gold sa SEAG. “Nagti-training siya (Catalan) ng mabuti. We are very supportive to him. Whatever he is doing right now, we are confident that he is doing his best to capture both victories for his self and for the country,” pahayag ni Tancontian sa panayam ng BULGAR sa messenger.