Pinoy pentathletes, una sa SEAG test event

Kinatawan ang Team Philippines ng mga student athletes mula Ormoc City, nakapagbulsa ng 3 gold medals sa pagsasara ng modern pentathlon test event para sa 30th Southeast Asian Games kamakailan sa boardwalk ng Subic Bay.

Kinumpleto ni Michael Comaling ang four-target laser pistol shooting/50-meter swim/800m run event sa loob ng 18 minuto at 56.22 segundo upang talunin ang isa pang Pinoy entry na si Dexter Ardemer na tumiyak ng silver, 19:43.25. Tumersera si Benjamin Benjadheerapong sa 19:49.62.

Nagtulong ang Subic Bay Metropolitan Authority, Philippine Sports Commission, Philippine SEA Games Organizing Committee at ang Philippine Modern Pentathlon Association para idaos ang test event para sa 11-nation SEA Games sa Nob. 30-Dis.11. Dinuplika ni Comaling ang tibay sa team relay ng parehong event kasama si Ivy Claire Dinoy nang maorasan sila ng 19:48.50 sa kabila ng sobrang init ng panahon.

“Mabilis ako sa huli sa running. Pero relaxed ako sa swim. Mabilis kasi kamay ko,” ayon kay Comaling.

Nadiskuwalipika si Princess Arbilon sa beach triathlete event, habang silver medalist si Samuel German sa oras na 20:59.55 habang ang duo nina Alne Tonada at Shira Aranzado ay naka-bronze 21:27.13.

Ang modern pentathlon ay isang Olympic sport na binubuo ng limang iba’t ibang events, tulad ng fencing (one-touch épée), freestyle swimming (200 m), equestrian show jumping (15 jumps) at final combined event ng pistol shooting at cross country running (3200 m).

Ang event ay orihinal na nagmula sa traditional pentathlon noong sinaunang Olympics.