Golden achievers Petecio at Yulo, may P1-M na insentibo sa PSC

Tatanggap ng tig-P1-M sina World Champions Gymnast Carlos Yulo at women’s Featherweight boxer Nesthy Petecio matapos ihatid sa mataas na karangalan ang Pilipinas sa pandaigdigang kompetisyon mula sa Philippine Sports Commission (PSC).

Ito ay matapos kunin ng 19-year-old Filipino gymnasts ang gold medal sa Floor Exercise ng 49th Artistica Gymnastics World Championships sa Hanns-Martin-Schleyer-Halle Arena sa Stuttgart, Germany, habang isinuntok ng 27-anyos na tubong-Santa Cruz, Davao del Sur ang 57kgs gold medal category sa 2019 AIBA Women’s Boxing Championships sa Ulan-Ude, Russia.

Nakuha ni Yulo ang qualifying mark sa 2020 Tokyo Olympics ng lumapag ito sa ika-7th place sa Floor Exercise na may 14.6333 mark at All Around Performance sa 18th place na may 82.164.

Ang Filipino artistic gymnasts ay ang ikalawang Filipino na lalahok sa 2020 Olympic Games kasunod ng Pole Vaulter na si Ernest Obiena na nakuha ang personal best na 5.81 mark sa Salto Con L’Asta Piazza Chiari meeting 2019 (Auction Meeting in the Square Pole Vault 2019) sa bansang Italy noong Setyembre.

Wala pang 24-oras ay napanalunan ni Petecio ang kanyang kauna-unahang gold medal sa international meet laban sa hometown bet na si Liudmila Vorontsova featherweight division championship bout. Makatatanggap si Yulo ng halagang P500,000 mula sa ilalim ng Republic Act 10699 o mas kilala bilang National Athletes and Coaches Benefits Incentives Act, gayundin ang karagdagang P500,000 pabuya na inaprubahan ng sports agency. Isa pang Filipino boxer na si Eumir Marcial ay mabibiyayaan ng P500,000 para silver medal finish sa world championships.

Ang Pole vaulter na si Obiena ay nakatakda ring magbulsa ng P250,000 mula sa pagkukuwalipika sa 2020 Olympics mula rin sa PSC. Maibabahagi ang mga tseke sa isang seremonya sa Malakanyang sa Miyerkules, habang gagawa si Senador Sonny Angara ng dalawang resolusyon upang ipagdiwang sina Yulo at Petecio.