Lady Falcons, nakauna sa Tigresses sa game 1 finals

Photo: Foxsports PH

Nagawang maka-ungos ng Adamson University Lady Falcons sa isang mahigpitang laro na nagtapos sa 5-setter victory laban sa palabang UST Lady Tigresses, 23-25, 25-17, 25-16, 21-25, 15-11 sa Game 1 ng kanilang PVL Collegiate Conference championship sa FilOil Flying V Center sa San Juan.

Nagpasiklab si rising star Trisha Genesis ng 21 puntos,16 digs at 20 excellent receives, kaantabay ang solidong back-ups mula kina rookies Lucille Almonte, Lorene Toring at setter Louie Romero upang makauna sa best-of-three title showdown. “We learned so much from our semis series with St. Benilde,” wika ni AdU coach Lerma Giron, na nakipagsagupa sa Lady Blazers sa dalawang five-setters bago nito kunin ang impresibong panalo sa game 3 sa 4 sets.

Bitbit ang kumpiyansang dala matapos pabagsakin ang 81st UAAP champions Ateneo Lady Eagles sa semis match, ipinakita ng Lady Falcons na hindi sila natitinag sa lakas ng Lady Tigresses nang tumulong sina Almonte ng 15 points, kabilang ang huling 3 puntos ng Adamson, habang dinomina ni Toring ang blocking department na may 7 kill blocks at may bitbit na 15 points. Nagpamalas ng 33 excellent sets si Romero upang tuluyang gibain ang España-based squad.