Rowing Team, sumagwan ng gold at silver sa Thailand

Sinagwan ng Philippine National Rowing Team ang 1 ginto, 2 pilak at 1 tansong medalya sa nakalipas na 2019 Asian Rowing Coastal Championships nitong Setyembre 18-22 sa Pattaya, Thailand.

Inahon ng pambansang koponan ang gintong medalya mula kina Melcah Caballero at Joanie Delgaco sa women’s double sculls habang kinuha nina dating Southeast Asian Games gold medalist Nestor Cordova at pares nitong si Zuriel Sumintac ang isang silver sa men’s doubles sculls at isa pang silver mula kay Roque Abala sa men’s solo (CM1x).

Nagtulong-tulong sina Dennis Almerio, Ma. Concepcion Fornea, Edgar Ilas, Cris Niervaez at John Oliver Patanao para makuha nila ang bronze medal sa men’s Coxed Quadruple Sculls (CM4x+).

Susubukang lampasan ng Pinoy rowers ang isang silver at isang bronze medal performance sa 2015 SEAG sa Singapore mula kina Cordova sa men’s single sculls 1,000m at tambalan nina Benjamin Tolentino Jr. at Ilas sa lightweight double sculls 1,000m.

Noong Abril ay nagawang mag-ensayo ng koponan sa China para sa isang buwang training sa ilalim ng Canadian coach na si Drew Harrison bilang preparasyon sa 30th edition ng SEAG na magbubukas simula Nob. 30-Dis. 11 ngayong taon sa iba’t ibang lugar sa Luzon. Magsisimula ang kampanya sa Dis. 5-8 sa Triboa sa Subic, Zambales.