Kayod-kalabaw na ang PSC sa pag-aasikaso sa Seag

Hiningi ni Philippine Sports Commission (PSC) chairman at Chef de Mission William “Butch” Ramirez ang kooperasyon at suporta ng lahat ng lider ng National Sports Association (NSA’s) para sa agarang solusyon pagdating sa mga importanteng pangangailangan ng mga ito bago magsimula ang biennial meet.

Muling nakipagpulong si Ramirez at ilang mga pinuno ng pampalakasan sa bansa para sa ikatatagumpay at ikaaayos ng isasagawang 56 sports sa 30th Southeast Asian Games sa bansa na magbubukas simula Nob. 30-Dis. 11, 2019.

“Tell us your problems and let’s get them solutions,” ani Ramirez sa mga NSA presidents at secretary-generals gayundin ang mga competition managers. “Let’s resolve all issues today and make sure we smoothly host the games,” dagdag nito sa ika-apat na Chef de Mission meeting sa Philippine International Convention Center sa Pasay City.

Hinikayat din ni Ramirez na panatilihin ng bawat isa ang pagkakaisa at pagtutulungan bilang mga pinuno ng bawat asosasyon upang maging malinis at maayos ang hosting ng bansa sa ika-apat na pagkakataon simula noong 1981, 1992, 2005 at ngayong taon. “This gathering will be a test of leadership of Filipino sports leaders. This will be a challenge. Today we are not PSC, POC or PHISGOC. We are all Team Philippines,” pahayag ni Ramirez na kasama rin sa pagtitipon sina Philippine Olympic Committee (POC) president Abraham Tolentino at POC chairman Steve Hontiveros, PSC Commissioners Charles Maxey, Celia Kiram, Deputy Chef de Mission Stephen Fernandez at Philippine SEA Games Organizing Committee (Phisgoc) Executive Director Tom Carrasco.

Nagbigay din ng instruksyon ang Phisgoc hinggil sa paghahanda nito sa ticketing, accommodation, venues, transportation, logistics at sports bago ang nalalabing dalawa’t kalahating buwan. Napag-usapan din ang ilang maliliit na problema sa venues gaya ng weightlifting, squash, kickboxing, skateboard at obstacle sports.