Natutulog nang masama ang loob, binabangungot

Socrates Magnus

Salaminin natin ang panaginip ni Emcee ng Emcee_Enepi@facebok.com

Dear Professor,

Lagi kong napananaginipan ang mga tiyahin ko, kahit ‘yung patay na ay gayundin. Masama ang loob ko sa kanila.

Ano ang ibig sabihin nito?

Maraming salamat!

Naghihintay,

Emcee

Sa iyo Emcee,

Ganito ang nasusulat, bago ka matulog, patawarin mo ang kapatid mong nagkasala sa iyo. Ang nabanggit na banal na utos ay wala yatang nakatutupad. Minsan, nakapagtataka, utos nang utos si Lord pero, ang mga iniuutos Niya ay na­pakahirap sundin, as in, walang sumusunod.

Kaya lang, sabi nga, si Lord ang tunay na nakaaalam kung ano ang dapat at hindi dapat gawin habang tayong mga tao, puwede nating malaman kung ano ang mabuti at masama.

Sabi ng mga eksperto, mas magandang matulog nang walang sama ng loob sa puso’t isipan. Ang mga salitang ‘yan ay madaling paniwalaan. Ang mahirap paniwalaan ay ang dagdag na kaalaman mula sa mga dalubhasa kung saan ang sabi nila, puwedeng bangungutin ang matutulog nang mabigat ang kalooban.

Narinig mo na ba ang kuwento ng mga binangungot? Hindi ba, ang sabi nila, parang may mabigat na dumadagan sa katawan nila kaya hindi sila makakilos at makagalaw?

Parang tama ang mga dalubhasa sa pagsasabing dapat matulog nang walang sama ng loob.

Kaya, kahit mahirap sundin ang nasusulat, patawarin mo na ang iyong mga kamag-anak sa kasalanang nagawa nila sa iyo.

Hanggang sa muli,

Professor Seigusmundo del Mundo