Pangarap ng wrestlers sa 30th seag, matutupad

MULING magpapa­tuloy ang pangarap ng 14 na national wrestlers na maka­mit ang mga inaasam na ta­gumpay sa nalalapit na 30th Southeast Asian Games (SEAG) sa bansa sa Nob. 30 hanggang Disyembre 11, 2019.

Inamin ni Wrestling Association of the Philippines (WAP) president Alvin Aguilar sa BULGAR na muling maibabalik sa aktuwal na kompetisyon ang wrestling matapos ibigay ni Philippine Olympic Committee (POC) chief Abraham “Bambol” Tolentino ang pangakong i-reinstate sila sa biennial meet. “Everything is pointing to reinstate,” pahayag ni Aguilar. “According to Cong. Tolentino, we will be back in the SEA Games. He said that we just need to pass our IF (International Federation) approval, which we already have, and that’s it,” dagdag ng DLSU alumna.

Ayon sa founder ng Universal Reality Combat Championship (URCC), naipasa na nila ang isa pang authorization document kay Philippine Southeast Asian Games Organizing Committee (Phisgoc) Chief Operating Officer Ramon “Tats” Suzara na pirmado ni Asian (Council) Federation president at bureau member ng United World Wrestling (UWW) na si Daulet Turlyk­hanov ng Kazakhstan.

Susubukan ng national wrestling team na makamit ang 5-6 gold medals sa biennial meet na magsisimula sa Dis. 9-10 sa Angeles University Foundation sa Angeles, Clark, Pampanga. Inaasahang kukunin ito nina Alvin Lobrequito (men’s 57kgs, Freestyle), Johnny Morte (men’s Freestyle), Margarito Angana (men’s 57kgs Greco Roman), Jason Balabal men’s 78kgs Greco-Roman), Noel Norada (men’s 62kgs Greco-Roman), Jiah Pingot (women’s 50kgs freestyle) at Minalin Foy-os (women’s 55kgs freestyle).