ABANGAN, CASIMERO VS. TETE SA WBO UNIFICATION BOUT

PUNTIRYA ngayon ni John Riel Casimero ang unification bout laban kay World Boxing Organization (WBO) bantamweight champion Zolani Tete matapos ang 10th round stoppage nito sa kalabang Mexican fighter nitong Sabado ng gabi sa San Andres Sports Complex.

Matagumpay na naipagtanggol ng 29-anyos na tubong Ormoc City ang interim WBO bantamweight title laban kay Cesar Ramirez ng Mexico sa isang malupit na upper cut.

Bago nito ay makailang beses na dumapa ang Mexican fighter simula 3rd, 5th at 7th rounds.

Ang two-division champion na si Casimero (28-4, 19KOs) ay nagawang hawakan ang International Boxing Federation (IBF) flyweight at junior flyweight champion, tatangkaing kunin ang kanyang ika-tatlong titulo laban kay Tete (28-3, 21KOs).

Napanalunan ni Casimero ang kanyang interim title nang pabagsakin nito si Ricardo Espinoza Franco ng Mexico sa 12th round noong Abril 20 sa Carson California.

Mayroong 12-game winning streak ang 31-years-old na South-African champion na nakatakda sanang makapagpalitan ng suntok kay Nonito Donaire noong Abril para sa World Boxing super series ngunit nagkaroon ng shoulder injury.

Kasalukuyang nagpapagaling si Tete na dati ring may hawak ng IBF junior bantamweight title.

Limang Filipino boxer na ang tinatalo ni Tete na kinabibilangan nina Rexon Flores (KO), Richard Garcia (UD), Eduard Penerio (KO), Jether Oliva (UD) at Arthur Villanueva (UD) para sa interim bantamweight title.