MAUUDLOT ANG PANGARAP NI SPENCE VS. PACMAN?

GAGAWA umano ng ingay si International Boxing Federation (IBF) welterweight titlist Errol “The Truth” Spence Jr. upang mapansin at hamunin si World Boxing Association (WBA) welterweight champ Manny “Pacman” Pacquiao bagama’t nagpahiwatig na kahapon ng rematch si Floyd Mayweather Jr. sa Pinoy.

Nakatakdang makipagbasagan ng mukha si Spence kay World Boxing Council (WBC) 147lb king Shawn “Showtime” Porter para sa kanilang unification bout sa Setyembre 28 sa Staples Center sa Los Angeles, California.

May lakas ng loob na sinabi ng 29-anyos na tubong Long Island, New York, na kailangan niyang pabagsakin si Porter sa FOX Sports PBC Pay-Per-View main event upang makaharap si Pacman. “I’m looking for Manny Pacquiao after this,” wika ni Spence, Jr. patungkol sa hiling na laban nito matapos ang laban kay Porter. “I definitely want the Manny Pacquiao [fight]. I mean, he’s a Hall of Famer, he’s a legend, he’s fought the best fighters of my era and the past era,” dagdag nito.

Kahit mas tinitingnan na sunod na makakalaban ni Spence si undefeated fighter Terence Crawford Jr. (35-0, 26 KOs) ay mas napipisil nitong makalaban ang 40-anyos na fighting Senator dahil hindi ito nakasisiguro kung gaano katagal pa ang ilalaro nito sa boxing ring.

“My whole thing is that I’m looking for the stoppage. I want to make a statement that I’m clearing out the division. I want Manny Pacquiao and all of the top names in this division. You never know when Pacquiao’s gonna retire, so I definitely want to get that fight,” bulalas nito.

Ang undefeated na American fighter na si Spence Jr. (25-0, 21 KOs) ay isa ring southpaw gaya ni Pacman (62-7-2, 39 KOs) at dati ring sumabak sa 2012 London Olympics.