Walang gustong magsakripisyo, trapik sa EDSA, forever na!

"KALBARYO sa EDSA, hanggang kailan kaya?”

Agosto pa lang, pang-Christmas level na ang nararanasang trapik sa EDSA.

Ayon sa Metropolitan Manila Development Au­thority (MMDA), mas mataas ng 601 percent ang volume ng trapiko sa EDSA kumpara sa kapasidad ng mga sasakyan, araw-araw.

Mas marami rin daw ang mahigit 380,000 mga sasakyang bumi­biyahe sa EDSA bawat araw gayung ang kaya lamang nito ay mahigit 50,000. Kung saan pinakamarami ang mga kotse na nasa 66% habang 22% ay mga motorsiklo at halos 4% ay mga bus.

Maaaring ito ang basehan kung bakit ipinanukala ang ‘bawal single sa EDSA’ o ‘yung mga sasakyan na driver lang ang sakay. Inihirit din na ipagbawal ang mga nakamotorsiklo na nasasangkot sa aksidente na nagiging sanhi rin ng trapik. Iginigiit din ang pagba-ban sa mga pro­vincial bus. Tipong kailangang may mawala para guminhawa. Ang tanong, may gusto bang magsakripisyo? Ako na kumportable sa kotse at hindi na kailangang pumila sa tren na palpak o makipagsiksikan sa bus na baka may holdaper pang kasakay? Ako na nakamotorsiklo na mas mabilis na nakakapagbiyahe? Ako na sumasakay sa provincial bus na hindi na kailangang magpalipat-lipat ‘pag pupunta ng Maynila?

Kung maayos, de-kalidad at ligtas lang sana ang ating mass transport system, malamang hindi tayo nagtatalo at nagdurusa sa EDSA.

Marahil, ‘yung iba — hindi lahat — imbes na magkotse o motor, sasakay na lang sa tren o bus, tipid na sa gas, mabilis din ang biyahe, nakapahinga pa sa pagda-drive. ‘Yun nga lang, kung safe at walang aberya sa biyahe.