DARAAN BA SA BUTAS NG KARAYOM ANG BACOLOD VS. STRIKERS SA MPBL?

MAGPAPATATAG ang Bacoor lalo na at idaraos ang laban sa kanilang balwarte kontra Bacolod ngayong Martes ng gabi sa Strike Gymnasium at inaasahang tutuntong sila sa solong 2nd spot ng Southern Division ng MPBL Lakan Season.

Nakapagwagi ang Strikers ng pito sa siyam na laro at kalahati ng game na nauna sa Southern Division Champion Davao Occidental Tigers. Pinapaboran sila laban sa Bacolod-Master Sardines na kanilang haharapin ng 8:30 p.m. sa main game. Napakahirap na pagsubok ito sa Bacolod na ngayon ay nasa 12th spot ng Southern Division na may bitbit na 3-6 win loss slate.

Ang koponan ay galing pa sa nakadidismayang pagkatalo sa Caloocan Supremos at mapapalaban nang husto kontra Strikers, pero pinatunayan din naman ng Bacolod na kaya nilang makapagwagi kontra sa nakaraan nilang mga kalabang powerhouse squads ng liga tulad ng panalo sa Zamboanga at Muntinlupa. Apat na team din ang nakatakdang magsagupa. Sisikapin ng Quezon City at Imus na magbalik sa winning streak sa salpukan nila ng 6:30 p.m. habang ang General Santos City at Navotas ay babanat ng 4 p.m. (MC)