BIKTIMA RIN NG GILAS SA TUNE-UP ANG IVORY COAST

DALAWANG panalo na ang nakuha ng Gilas Pilipinas sa kanilang tune-up games sa Guadalajara, Spain.

Kahapon ay tinalo ng Gilas Pilipinas ang mas malalaki at matatangkad na Ivory Coast, 94-83 sa ikala­wa nilang tune-up game sa Palacio Multiusos de Guada­lajara bilang paghahanda ng koponan para sa FIBA Basketball World Cup. Nauna nang nag­wagi ang Gilas Pilipinas kontra Con­go, 102-80, ilang araw ma­tapos dumating sa Spain para sa kanilang training camp. Nanguna si natura­lized player Andray Blatche sa parehong laro matapos mag-ambag ng 18 points, 7 rebounds, at 2 steals para sa koponan sa kanilang laro kontra sa Ivory Coast. Gu­mawa ng 25 points si Blatche sa laro kontra sa Congo.

Nauwi sa 9-man team pagkatapos ma-injured ang beteranong guard na si Gabe Norwood, maagang nalama­ngan ang mga Pinoy ng kanilang katunggaling no. 62 sa world rankings sa first quarter, 28-19.

Pagdating ng second period, nag-init si Paul Lee at pinamunuan ang pagrat­sada ng Gilas Pilipinas na kumalos sa bentahe ng Ivory Coast sa 5 puntos sa pagta­tapos ng first half. Sa second half, doon nagsimulang domi­nahin ng Gilas ang Ivory Coast.

Ma­laking ba­gay din ang nagawa ni Lee na may 16 puntos at nina Japeth Agui­lar at CJ Perez na may 12 at 11 pun­tos ayon sa pagka­kasunod.

Samantala, hindi nakala­ro sa ikalawang closed door tune-up game si Norwood dahil sa natamong mild groin strain vs. Congo.

Sampu lang ang naka­sama sa training camp ng Gilas Pilipinas sa Spain dahil sa PBA Commissioner’s Cup Finals kung saan nag­lalaro ang TNT at San Mi­guel. Ang mga hindi naka­sama sa biyahe ay sina Troy Rosario, Roger Pogoy, June Mar Fajardo, Christian Standhardinger at Marcio Lassiter.