SASO AT PAGDANGANAN, PASOK SA 50 PARBUSTERS NG MUNDO

KABILANG sina Yuka Saso at Bianca Pagdanganan ng Pilipinas sa 50 pangunahing babaeng parbusters sa buong mundo base sa pinakahuling World Amateur Golf Ranking o WAGR na ipinalabas kamakailan.

Ang Pinay-Haponesang si Saso, 18-anyos, ay nakaupo sa career best na pang-20 posisyon dahil sa nakolektang 1,158.3978 puntos habang ang naipong 1,072.3777 ng 21-anyos na si Pagdanganan ay sapat na para makaposisyon sa pang-42 baytang.

Malaking tulong sa pagsampa ni Saso mula sa pang-25 papunta sa top 20 ang podium finishes niya sa US Girls’ Junior Championship (3rd place, Hulyo 2019), Girls Junior PGA Championship (1st place, Hulyo 2019), ICTSI Manila Golf Ladies Masters (2nd place, Abril 2019), Augusta National Women’s Amateur Championship (3rd place, Abril 2019), The Country Club Ladies Invitational (2nd, Marso, 2019), Philippine Ladies Open (1st, Marso, 2019), ANNIKA Invitational Australasia (2nd, Disyembre 2018), Rolex Tournament of Champions (2nd place, Nobyembre 2018), Youth Olympic Games (2nd place, Oktubre 2018) at Asian Games (1st place, Agosto, 2018).

Sumandal si Pagdanganan, katuwang ni Saso sa pagkuha ng ginto sa Asiad women’s team event, sa mga koronang nakuha niya sa Hawkeye El Tigre Invitational noong Marso 2019 at sa Santi Cup noong Disyembre 2018; ang bridesmaid performance niya sa Philippine Amateur Open noong Enero 2019; at ang pagiging pangatlo sa Rebel Beach Intercollegiate (Pebrero 2019) at sa Asian Games (Agosto, 2018).

Dalawang kinatawan ng Southeast Asian powerhouse na Thailand ay nakaaangat kay Saso. Ito’y sina no. 4 Atthaya Thitikul (1,359.0027 puntos) at no. 19 Jaravee Boonchant (1,158.6766).

Dalawang iba pang lady golfers ng Asya ang nasa unang 20 (no. 7 Jiwon Jeon mula sa South Korea na may iskor na 1,299.1543 at no. 11 Yuka Yasuka ng Japan sa kartadang 1,269.1076 puntos).