AMOY TANSAN NA BA SA FINAL? BEERMEN, DUMALAWA VS. ROS

MALAKI na ang tsansa ng San Miguel Beer na sumampa sa finals matapos nilang kaldagin ang Rain or Shine Elasto Painters, 117-105 sa PBA Commissioner’s Cup kagabi sa Araneta Coliseum. Kumayod si Chris Ross ng 34 points at walong assists para tulungan ang Beermen na ilista ang 2-0 bentahe sa kanilang best-of-five semifinals series. Umarangkada ang Elasto Painters sa first quarter, hinawakan nila ang 21-point lead, 34-13. Bumangis naman ang Beermen sa second, nilagok nila ang 38-18 para tapyasin sa tatlo ang kanilang hinahabol, 49-52 sa halftime.

Nagtuloy ang mainit na laro ng San Miguel sa third kaya naagaw nila ang lamang, 89-73 papasok ng fourth period. Samantala, may tsansa ang TNT KaTropa na walisin ang Barangay Ginebra Gin Kings sa Game 3 ngayong alas-7 ng gabi sa Mall of Asia Arena sa Pasay City. Tangan ng KaTropa ang 2-0 sa kanilang best-of-five semifinals series kaya isang hakbang na lang at sampa na sila sa championship round. “As of now, hindi naman namin iniisip na masu-sweep,” saad ni TNT point guard Jayson Castro.

Bukod kay Castro, tiyak na sasandalan ng KaTropa ang kanilang import na si Terrence Jones na kumana ng triple-double sa Game 2. Nasa delikadong sitwasyon ang Gin Kings pero hindi sila nababahala at sisikapin nilang makuha ang panalo para humaba ang kanilang buhay. “Just having that never-say-die type of attitude,” ani Gin Kings reinforcement Justin Brownlee.

“I know coach [Tim Cone] will definitely go make some adjustments now we’re down 0-2. So just come in tomorrow [in practice] and see what he got to say.” Si reigning best import Brownlee naman ang ibabangga ng Gin Kings. “We played terrible and they played great. I don’t have anything to say,” hayag ni Cone. (ATD)

Laro ngayon: (Mall of Asia Arena) 7:00 p.m. - Bgy. Ginebra vs TNT KaTropa