PSC PATULOY ANG PREPARASYON PARA SA MGA ATLETA SA SEAG

MALUGOD na ibinalita ni Philippine Sports Commission (PSC) chairman at Chef de Mission William “Butch” Ramirez ang patuloy na magandang pagpapatakbo at paghahanda ng kanilang ahensiya para sa nalalapit na 30th Southeast Asian Games (SEAG) simula Nobyembre 30 hanggang Disyembre 10 dito sa Pilipinas.

Ipinahayag ni Ramirez ang anunsiyong ito sa harap ng mga representante ng Association of Southeast Asian Nations (ASEAN) region sa magkasunod na pagtitipon sa 2nd CDM meeting at Fellowship Night na ginanap sa Manila Hilton Hotel sa Resorts World Manila na dinaluhan ng mga prestihiyosong lider ng iba’t ibang bansa.

Kabilang sa mga dumalo rito ay sina Muhd Zamri Dato Hamdani ng Brunei, Mr. Sengphone Phonamath ng Laos, Mr. Sokvisal Nhan ng Cambodia, Hon. Senator Datuk Zulkarnain Tan Sri Omardin ng Malaysia, Mr. Vicente Carvalho Da Silva ng East Timor at ang CDM ng Vietnam na si Mr. Tran Duc Phan.

Naroon din sa naturang pagtitipon ang mga kinatawan ng bansang Indonesia na si Mr. Harry Warganegara, Mr. Kyaw Zin Moe ng Myanmar, National Olympic Committee (NOC) Secretary-General Chris Chan ng Singapore at si NOC treasurer Mr. Thana Chaiprasit ng Thailand.

“We truly appreciate your continuous support in our hosting of this momentous event.

We would like to thank and welcome our ASEAN brothers and sisters who are with us today.

Let us remember that the success of one, is the success of the whole ASEAN region,” pahayag ni Ramirez na kaantabay din sa pagtitipong ito sina PSC commissioners at deputy CDMs Ramon Fernandez, Celia Kiram, Charles Maxey at Arnold Agustin.

Kaagapay sa pag-oorganisa ng PSC sa naturang event ang Philippine Southeast Asian Games Organizing Committee (PHISGOC), na ipinasilip ang medalyang ipamamahagi sa mga mananalong atleta sa biennial meet habang ipinarinig ni Maestro Ryan Cayabyab ang magiging ‘theme song’ ng naturang event na “We Win as One.”

Hindi umano nakadalo sa naturang event ang PHISGOC chairman at bagong House Speaker na si Alan Peter Cayetano, habang wala pang representante ang panig ng Philippine Olympic Committee (POC) na mag-eeleksiyon pa lamang sa darating na Hulyo 28.