TITULO NG D-LEAGUE SA ATENEO NA O CEU, BABAWI?

GANAP na mawakasan ang serye at maangkin ang titulo ang tatangkain ng Cignal-Ateneo sa pagsabak nito sa Game Four ng 2019 PBA D-League Finals kontra Centro Escolar University ngayong hapon sa Ynares Sports Arena sa Pasig City. Abot-kamay na ng Blue Eagles ang pinakaaasam na unang kampeonato sa developmental league matapos ang 67-52 panalo nila noong Game Three bilang pagbawi sa natamong 74-77 na kabiguan noong Game Two.

Ayon kay Ateneo deputy coach Sandy Arespacochaga, tuloy pa rin ang pinagdadaanan nilang proseso ng pagpapalakas ng kanilang koponan kung saan dapat silang matuto. “We have to play each game and be present for each game. We can’t look past every game and we have to make sure we do our job for the next game,” pahayag ni Arespacochaga.

Inaasahang muling mamumuno sa Blue Eagles sina Conference MVP Isaac Go, Ivorian center Ange Kouame at Thirdy Ravena ngunit, kailangan din nila ang overall prowess ng buong Cignal-Ateneo bench para magwagi sa sagupaan nila ng Scorpions ng 4 p.m. Sa panig ng CEU, “nothing to lose” na sila para kay coach Derrick Pumaren na ipinagmamalaki na ang inabot ng kanyang koponan.

“Like what I said before, these boys are already champions in my eyes. Whatever happens, we’re just going to go out and try to give a hell of a fight to Ateneo,” ani Pumaren.

Sasandigan ulit si Senegalese slotman Maodo Malick Diouf ng Scorpions na magtatangkang pahabain ang series kasama sina Rich Guinitaran, Jerome Santos at Franz Diaz. (VA)

Laro ngayon: (Ynares Sports Arena, Pasig) Game 4 of Best-of-5 Finals (Blue Eagles lead series, 2-1)

4 p.m. - CEU vs Cignal-Ateneo