PETSA NG PHL SEAG, IUURONG SA 2020?

ISANG araw matapos bumaba sa kanyang posisyon si Ricky Vargas bilang pangulo ng Philippine Olympic Committee (POC), nangako naman ang pumalit sa kanyang si Joey Romasanta kahapon na walang sasayanging oras upang matiyak na magiging matagumpay ang pag-host ng bansa sa 30th Southeast Asian Games sa Nobyembre.

Inatasan na ni Romasanta si dating POC secretary general Steve Hontiveros para magpatawag ng emergency SEA Games Federation Council meeting at kausapin na ang 10 iba pang member countries para sa ‘latest development’ ng preparasyon ng Pilipinas.

Aniya, kailangan nilang humanap ng solusyon upang makagalaw na dahil ang SEAG preparation ay ‘di naasikaso dahil sa ilang hadlang na legal na isyu.

“A lot of work still needs to be done,” ayon kay Romasanta, na ibabalik sa Philippine sports bilang dating chief ng matagumpay na proyektong Gintong Alay sa panahon ng administrasyon ni dating Pangulong Corazon Aquino.

“We have to regroup and sync everything together not just on the part of the POC, but also on the part of the PSC (Philippine Sports Commission), the SEA Games Federation Council, and our national government. Everybody has to be aligned and be on the same page. We have to find a solution in every problem.” Isa sa solusyon na tinitingnan ay iatras ang petsa ng SEA Games sa unang bahagi ng 2020. Pakay din ng POC na bawasan ang bilang ng mga events dahil malaking paghamon ang pagho-host ng 56 na sports lalo na at limang buwan na lamang ang nalalabing paghahanda. “We are ready to pick up the pieces,” ayon kay Romasanta at idinagdag na ang emergency meeting ay idaraos sa sandaling ang unang POC general assembly ay matapos sa Hunyo 25 sa Government Service Insurance System Gymnasium. (MC)