‘DI PATITINAG ANG BLAZE, TORNADOES SA 2ND WIN

SISIKAPING panindigan ng Petron Blaze Spikers ang three-peat championship habang pakay ng Foton na masungkit ang ikalawang straight win sa paglargang muli ngayon ng Philippine Superliga All-Filipino Con­ference sa Imus Sports Center sa Cavite.

Makasasagupa ng Blaze Spikers ang newbie Mari­nerang Pilipina ng 4:15 p.m. habang masusubukan ng Tornadoes ang tikas ng Ge­nerika-Ayala sa 7 p.m. main game ng prestihiyosong women’s club tourney.

Ipaparada ni Blaze Spi­kers head coach Shaq Delos Santos sina reigning University Athletic Association of the Philippines Most Valuable Player Sisi Rondina ka­sama ang mga solidong crews na sina Ces Molina, Aiza Maizo-Pontillas, Mika Re­yes, Bernadeth Pons at Rhea Dimaculangan. “We have to take care of the dynasty that we worked hard for,” ayon kay Delos Santos dahil asam ng kanyang team ang walang bahid na three-peat win.

Samantala, hangad ng Foton na makasalo ang F2 Logistics sa ibabaw ng team standings kasunod ng nakakukumbinsing 17-25, 25-18, 25-16, 25-21 victory laban sa Sta. Lucia sa FilOil Flying V Centre sa San Juan.

Nanguna si Elaine Kasilag sa scoring sa bisa ng 20 points habang sina Jaja Santiago at Dindin Manabat ang nag­mando sa depensa hanggang dulo.

Sinabi ni Tornadoes coach Aaron Velez na uma­ngat na ang laro ni Kasilag matapos silang magpasya na hindi sila dapat umasa nang husto sa Santiago sisters pagdating sa opensiba. “I don’t want to bank too much on the Santiago sisters. This is a team sport so I told them that we’re not build a star player here, we want to make a star team,” saad ni Velez.

Tiyak na pahihirapan din ng Generika-Ayala, ang Foton makaraang gapiin ang Lady Skippers noong Mar­tes, 25-18, 25-15, 25-23.

Umaasa si Lifesavers head coach Sherwin Meneses sa mahigpit na depensa at malakas na opensa ng kan­yang core na sina Patty Oren­dain, Ria Meneses, Fiola Ceballos, Angeli Araneta, Jamie Lavitoria at libero Kath Arado. “Generika is a defensive team. They can sustain their energy from start to finish,” ayon kay Velez sa pagharap sa Lifesavers. “We have to double time because they already adjusted from their first game.” (VA/MC)

Laro Ngayon: (Imus Sports Center)

4:15 pm - Marinerang Pilipina vs Petron

7:00 pm — Foton vs Generika-Ayala