DIAZ AT PSC, NAGKAAYOS NA

KASAMA ni AFP Special Services Chief Col. Taharudin Ampatuan, nakipagkita si Rio Olympics Silver medalist Hidilyn Diaz kay Philippine Sports Commission Chairman William Ramirez kamakalawa ng tanghali at pinag-usapan ang isyu hinggil sa pag-post ni Diaz ng paghingi ng tulong sa social media. “The government will continue to support her,” saad ni Ramirez. Idinagdag niya na sa board meeting, inaprubahan nila ang dalawa pang hiling na tulong ni Diaz para mapondohan ang training niya sa China.

“We have pledged our support before, and we will continue to do so because we are focused on that Olympic gold as much as Hidilyn is,” ayon sa PSC Chief.

Nangako naman si Diaz na hindi susuko sa kanyang Olympic quest. “Let’s journey together towards that gold,” saad ni Ramirez kay Diaz.

Sumaksi rin si PSC Commissioner Charles Maxey nang salubungin nila si Diaz sa PSC Philsports Complex offices.

Nagkaroon uli ng pulong kahapon sina Diaz at Ramirez upang maipagpatuloy nang maayos ang mga detalye ng kanyang trainings at preparation requirements. (MC / ATD)