RONDINA AT LACUNA, AWARDEES NG UAAP ’81 ATHLETES OF THE YEAR

DALAWA sa kinilalang pinakamahusay na atleta sa kani-kanilang sports sa UAAP ang ginawaran ng pangunahing karangalan ng liga sa kanilang huling taon bilang mga student athletes. Pinarangalan sina University of Santo Tomas Women’s Volleyball Team captain Cherry Rondina at Ateneo de Manila University swimmer Jessie King Lacuna bilang UAAP Season 81 Athletes of the Year sa Team at Individual sports sa seniors division noong Martes ng gabi sa closing ceremony na idinaos sa MOA Arena sa Pasay City.

Sa limang taon ng paglalaro sa UST, nagwagi si Rondina ng apat na UAAP beach volleyball championships at apat ding MVP awards. At sa huling taon ng collegiate career, pinarangalan din ang 5-foot-6 spiker bilang MVP sa indoor volleyball. Siya ang pangalawang student athlete pagkatapos ni Wendy Semana na nanalo ng top individual awards sa indoor at beach volleyball. Ang two-time Olympian na si Lacuna ay naging dominanteng personalidad sa UAAP swimming competition nang pamunuan ang Ateneo sa limang sunod na men’s title.

Sa collegiate career, umani si Lacuna ng 35 gold medals, apat na MVP plums at dalawang Athlete of the Year honors, ang una ay noong Season 78. Iginawad din sa UST ang ikatlong sunod na General Championship trophy at 42nd overall sa seniors division at ang ika-19 na general championship sa juniors division.

Nalikom ng UST ang kabuuang 279 puntos kung saan ang bulto nito ay buhat sa naitala nilang kampeonato sa Women’s Beach Volleyball, Men’s Beach Volleyball, Men’s Table Tennis, Women’s Table Tennis, Men’s Judo at Women’s Judo.

Sumegunda ang La Salle na may 260 puntos at patas sa 3rd place ang Ateneo at UP na kapwa may 237 puntos. (VA)