6TH PODIUM PARA KAY DIAMOND SA US 9-BALL

IPINOSTE ni Zoren James “Dodong Diamond” Aranas ng Pilipinas ang kanyang ikaanim na podium performance sa 2019 nang pumangatlo ito sa Big Tyme Billiards 9-Ball Classic sa Spring, Texas.

Dalawang cue artists pa mula sa lahing kayumanggi ang pumasok sa top 5 ng kompetisyon sa katauhan nina Warren “The Warrior” Kiamco at Alex “The Lion” Pagulayan.

Kasama sa mga sinagasaan ni Aranas, na kasalukuyang nasa pang-anim na puwesto sa 2019 AZBilliards Moneyboard dahil sa nakuha niyang $30,475, papunta sa podium sina David Coates, Moe Ali, Derek Fontenot, Justin Espinoza at Hanni Alhowri bago siya napatalsik palabas ng “zero-loss” bracket ng Kuwaiti hotshot na si Omar al-Shaheen.

Sa “one-lose” side, biniktima ng Pinoy ang Cebuanong si Warren “The Warrior” Kiamco at Derby City Classic (DCC) Master of the Table Skyler Woodward pero tuluyan na siyang pinahinto sa paglalakbay ni Alexander Espinosa.

Nauna rito, pumasok din si Aranas sa winners’ circle ng mga sumusunod na paligsahan: Super Billiards Expo 10-Ball Open (1st), Annual Barry Behrman Memorial (1st), Derby City Classic 9-Ball (2nd), Predator Grand Finale (3rd) at Maryland State 9-Ball Bar Table (3rd).

Samantala, pangungunahan ni Francisco “Django” Bustamante ang atake ng mga Pinoy cue artists sa taunang Buffalo Pro Classic One Pocket na sasargo ngayong Mayo 23 hanggang 26 sa kahabaan ng Bloomfield sa Jefferson, Los Angeles. Ngayong 2019, ang 56-anyos na alamat mula sa Tarlac ay nakakopo na ng dalawang titulo sa larangan ng One Pocket (Big Tyme Billiards at sa Derby City Classic).

Kasama rin sa bakbakang may cash pot na USD 10,000 sina Efren “Bata” Reyes, Dennis “Robocop” Orcullo, Alex “The Lion” Pagulayan at Roberto “Superman” Gomez.

Nag-aambisyon din sa kampeonato ng paligsahang nilimitahan lang sa 16 na malulupit na one pocket cue artists ang mga local hopefuls na sina Scott Frost, Josh Roberts, Tony “T-Rex” Chohan, Corey Deuel, Chip Compton, Mark Gregory, Jeremy Jones, Jason Brown, Danny Smith, Evan Lunda at Justin Hall.