BACOOR STRIKE, NAKA-OT WIN VS. VALENZUELA SA M-LEAGUE

NAKASUNGKIT ang playoff-bound Bacoor Strike sa Serbisyo ng 93-85 overtime win kontra Valen­zuela upang manatiling walang talo at nalagay na sila sa isa sa top two spots ng South Division ng Metro League Reinforced (Second) Conference noong Huwebes ng gabi na idinaos sa Hago­noy Sports Complex sa Taguig City. Naiwan sa 2 puntos sa hu­ling 7 segundo ng regulas­yon, 78-80, nakaa­lagwa agad si Mark Montua­no para sa Strikers nang kumunekta ng game-tying lay up sa buzzer mula sa pasa ni Mark Doligon at makapu­wersa ng ekstrang oras.

Hindi na lumingon pa ang kulang sa tao na Bacoor mula nang makadagdag si Montuano ng lima pang puntos sa OT sa tulong nina Doligon at Paolo Castro at maitakda ang pinagpagurang panalo laban sa All-Filipino conference champion na Valenzuela at makumpleto ng Strikers ang pagbawi mula sa pagkaiwan sa halos 15 puntos bago magtapos ang oras sa 3rd period at 10 puntos sa nalalabing 4 minuto sa regulation.

Tumapos si Montuano ng 23 puntos at 9 rebounds upang mamuno para sa Strikers na nanatiling imaku­lada o malinis ang record sa 7-0 at iselyo ang isa sa top 2 seeds ng South Division at ang all-important twice-to-beat incentive tungo sa quarterfinals ng M-League ng Metro Manila Develop­ment Authority (MMDA), Philippine Basketball Asso­ciation (PBA) at Barangay 143 bilang league presen­tor. Nag-angat kay Montu­ano ang gunners na sina Doligon at Castro na pumos­te ng 21 at 20 marka na magkasunod.

Sa kawalan nina big men Michael Mabulac at import Prince Orizu, si King Desca­mento ang namahala sa big game sa bisa ng all-round 11 puntos, 11 boards kasama ang 3 assists, 2 steals at tat­long blocks para sa Bacoor.

Sa kabilang banda, nakapagsubi si Erwin Sta. Maria ng 20 puntos at 4 re­bounds para sa Workhorses na lumagpak sa 2-3 sa North Division ng liga.

Sa iba pang laro, nanaig ang home team Generals kontra Pasigueño, 86-54, kasunod ng Bacoor sa post-season ng import-flavored na M-League conference.

Umagapay si reinforce­ment Emmanuel Ojoula ng 27 puntos, 10 rebounds at 2 blocks sa loob ng 26 minuto ng aksiyon para sa Generals na nakapagwagi ng huling dalawang laro sa average margin na 35.0 puntos.

Nakapag-ambag sina Richmond Gilbero at Lerry John Mayo ng 14 at 10 pun­tos para sa Taguig na may kartadang 5-2 para manati­ling matatag sa twice-to-beat edge sa South Division.